كتب:حسام داود
حكومتنا بتفكر بعقل نمله
مهما إتنفخت أو عملت فيل
فكر عقيم عمره ما يتغير
وغباء بيسلم جيل ورا جيل
بس غباءها من نوع نادر
مش هتلاقى زيه بديل
بتقتل حلم شبابها عشان
تتحقق أحلام كل عويل
عايزاك دايما تبقى ضعيف
تبوس فى إديها لاجل رغيف
واللى سارقها بتبوس إيديه
وأكله تملى من إيد شيف
وإن يوم تعمل فيها مفتح
بقدره قادر هتبقى كفيف
شاربين فيها مرارها الطافح
وبرغم دا كله تقولك كافح
خيرها مغرق خلق بعينها
وعالغلبان خيرها دا شاحح
والحق باطل فيها وخيرها شرها
دايما تقول كلمه وتمشى عكسها
يعنى تبقى ملتزمه وإسلاميه
بس عادى جدا لو عرت جسمها
يعنى تبقى دستوريه وليبراليه
بس عادى بالظلم ندخل سجنها
مايهمنيش تصنيفها ولا توصيفها
المهم الكل ياخد حقه وبس منها
